Արևմտյան Հայաստանի նոր ձևավարված կառավարությունն այսօր մամլո պաշտոնական հաղորդագրություն է տարածել` բարձրաձայնելով հայության պահանջատիրության մասին:

«Արևմտյան Հայաստանի նկատմամբ բնիկ ժողովրդի` հայության պահանջատիրությունը, որպես այդպիսին, մեր իրականության մեջ կորցրել էր իր տեղը: Եվ տասնամյակներ շարունակ հայ ժողովրդի պահանջատիրությունը տարբեր քաղաքական ճնշումների ազդեցությամբ վերածվեց մշուշապատ մի գործընթացի`միայն որպես ցեղասպանության ճանաչման քաղաքական խնդիր»,-ասցած է հաղորդագրության մեջ:

Կառավարությունը գտնում է, որ քաղաքական իրականության մեջ ինչպես ներսում, այնպես էլ դրսում, այսօր Արևմտյան Հայաստանի հիմնախնդիրը ընկալվում է մասնավոր դրսևորումներում` ընդամենը որպես ապահովագրական ընկերություններին ուղղված դատական հայցեր: Իսկ Ցեղասպանության միջազգային ճանաչման խնդիրը մատուցվում է որպես միակ բացարձակ ճշմարտություն, անտեսվում է, որ ցեղասպանությունը հայության նկատմամբ գերտերությունների որդեգրած քաղաքականության ողբերգական հետևանք է:

«Վաղուց արդեն ժամանակն է զգացական դաշտից տեղափոխվել միջազգային իրավունքի հարթություն և պահանջատիրությունը բխեցնել միջազգայնորեն հայտնի իրավական վճիռներից»,-ասված է հաղորդագրության մեջ: