Ադրբեջանը սպառնում է հարվածներ հասցնել Լեռնային Ղարաբաղ ուղեւորվող օդանավերին
Տեղադրվել է6:46 PM
«Լեռնային Ղարաբաղի օդային տարածքը գտնվում է Ադրբեջանի իշխանությունների տնօրինության տակ, այն փակ է, եւ համաձայն «Ավիացիայի» մասին օրենքի՝ մենք կարող ենք վերացնել օդանավերը, որոնք ուղեւորվում են այդ տարածաշրջան», - հայտարարել է Մամեդովը։
Վերջինիս խոսքով, Ադրբեջանի իշխանությունները տեղեկություններ են ստացել Ստեփանակերտում վերակառուցվող օդանավակայանի մասին, եւ այժմ նախազգուշական միջոցառումներ են ձեռնարկում:
«Մենք դեռեւս անցած տարվա հոկտեմբերին տեղեկացրել ենք Քաղաքացիական ավիացիայի միջազգային կազմակերպությանը, որ դեպի Ստեփանակերտ ուղեւորվող ցանկացած չվերթ անօրինական է, եւ մենք իրավասու ենք ֆիզիկապես ոչնչացնել այդ օդանավերը», - հայտարարել է Ադրբեջանի քաղաքացիական ավիացիայի պետական վարչության ղեկավարը։
Ըստ Մամեդովի, միջազգային կազմակերպությունը խորհուրդ է տվել Բաքվի իշխանություններին «միանալ մի քանի կոնվենցիաների եւ ջանքեր գործադրել՝ հնարավոր բացասական միջադեպերից խուսափելու համար»:
«Պաշտպանության նախարարության հետ հարցը համաձայնեցնելուց հետո մենք երկրորդ նամակը ուղարկեցինք Քաղաքացիական ավիացիայի միջազգային կազմակերպությանը, եւ խորհուրդ տվեցինք միջադեպերից խուսափելու համար հնարավոր հետեւանքների մասին նախապես իրազեկել հակառակորդ կողմին», - ասել է Մամեդովը եւ հավելել, - «մեր տեղեկություններով, կազմակերպությունն արդեն այդ նամակն ուղարկել է Հայաստանի իշխանություններին»: Հաղորդում է «Ազատությունը»: