Հայաստանի բռնցքամարտիկները չկարողացան մեդալ նվաճել բուլղարական Պազարջիկ քաղաքում կայացած բռնցքամարտի միջազգային մրցաշարում: Հայաստանի 6 բռնցքամարտիկներից 2-ը՝ 60 կգ քաշային Վլադիմիր Սարուխանյանը եւ 75 կգ քաշային Արթուր Խաչատրյանը, տոնեցին երկուական հաղթանակ, բայց անգլիացի եւ կուբացի մրցակիցների հետ երրորդ մրցամարտերում նրանց հաշվին , ըստ ՀՀ բռնցքամարտի ազգային հավաքականի գլխավոր մարզիչ Ռաֆայել Մեհրաբյանի, անարդար պարտություն գրանցվեց հավասար մրցապայքարում:

Ռ. Մեհրաբյանը  հայտնել է, որ այս մրցաշարին մասնակցելու հիմնական նպատակը շատ մրցամարտեր անցկացնելն էր` նախապատրաստվելով հունիսի 4-13-ին Մոսկվայում կայանալիք բռնցքամարտի Եվրոպայի առաջնությանը, բայց մրցավարությունը բացահայտ կողմնակալ էր. արդեն առաջին մրցամարտերում սուբյեկտիվ վիճակահանության արդյունքում միմյանց հետ մրցեցին հիմնական ֆավորիտները՝ Ռուսաստանի, Կուբայի, Ուկրաինայի, Հայաստանի մարզիկները: Դրա արդյունքում Հայաստանի մարզիկները նույնպես տուժեցին:

Ռ. Մեհրաբյանը նշեց նաեւ, որ մարտի 21-27-ին Հայաստանի բռնցքամարտիկները կմասնակցեն Չեխիայի Ուստ նադ Լաբեմ քաղաքում կայանալիք եւս մեկ միջազգային մրցաշարի: Թիմի մարզիչները շարունակելու են սուր մրցակցություն պահպանել ՀՀ բռնցքամարտի ազգային հավաքականի կազմում, որպեսզի միայն լավագույն բռնցքամարտիկը տեղ զբաղեցնի ազգային հավաքականում: