Այցելություն Շիրակի մարզ
Տեղադրվել է2:25 AM
Հայաստանի նախագահը մարտի 24-ին Շիրակի մարզ այցելության շրջանակներում եղել է Ամասիայի շրջանի Բանդիվան համայնքում, որտեղ այցելել է մարտական հենակետում հունվարի 20-ին հակառակորդի կողմից հրազենային գնդակից մահացու վիրավորված եւ զոհված պայմանագրային զինծառայող, ավագ լեյտենանտ Հովհաննես Սուքիասյանի հայրական տուն:Նախագահի մամուլի գրասենյակից հայտնում են, որ Սերժ Սարգսյանն իր ցավակցությունն է հայտնել ազատամարտիկի ընտանիքի անդամներին, շնորհակալություն հայտնել Հովհաննեսի նման որդի դաստիարակելու համար եւ ներողություն խնդրել, որ չկարողացավ պահպանել նրա կյանքը:
«Որպես Երկրի նախագահ, կարող եմ ձեզ խոստանալ, որ ամեն ինչ անելու եմ, որպեսզի ԼՂ հակամարտությունը խաղաղ ճանապարհով լուծվի, որ այդ խաղաղությունն արժանապատիվ լինի: Դա լավագույն հարգանքի տուրքը կլինի մեր բոլոր զոհվածների հիշատակին: Նրանք կարողացան կյանքի գնով պաշտպանել մեր Հայրենիքը, մենք կկարողանանք արժանապատիվ խաղաղություն կնքել»,- ասել է Սերժ Սարգսյանը: Նա այնուհետեւ Հովհաննեսի հոր եւ պապի հետ այցելել է ազատամարտիկի շիրիմին:
