«ՄԱԿ-ի սահմանած «Հազարամյակների մարտահրավերներ» ծրագրի շրջանակում առաջնային խնդիր է մանկական մահացությունների թվի նվազումը, ու Հայաստանն էլ պարտավորություն է վերցրել երկրում նվազեցնել նորածին երեխաների մահացության թիվը` մշակելով «Երեխաների կրծքով սնուցման խրախուսման և մանկական սննդի շրջանառության մասի» օրենքի նախագիծը»,- այս մասին այսօր Ազգային ժողովում «Երեխաներին կրծքով սնուցման խրախուսման օրենսդրական կարգավորումը» թեմայով կազմակերպված խորհրդարանական լսումների ժամանակ ասաց ՀՀ ԱԺ առողջապահության, մայրության և մանկության հարցերի մշտական հանձնաժողովի նախագահ Ա.Բաբլոյանը:

Ա.Բաբլոյանի խոսքով` բազմաթիվ փաստեր կան, որ կրծքով սնուցումը միլիոնավոր երեխաների կյանք է փրկում. կրծքով չսնվող երեխաները կարող են մահանալ փորլուծությունից, միևնույն ժամանակ չորս անգամ մեծ է հավանականությունը, որ կարող են մահանալ նաև թոքաբորբից:

«Պատշաճ սնուցումը յուրաքանչյուր երեխայի աճի և զարգացման գրավականն է»,- ասաց նա` հիշեցնելով 1981թ. UNICEF միջազգային կազմակերպության կողմից մշակած «Կրծքի կաթի փոխարինիչների վաճառքի հանման մասին» միջազգային կոդեքսը, որին միացել են բազմաթիվ երկրների կառավարություններ և կաթնարտադրող ընկերություններ:

Խորհրդարանական լսումների մասնակից ՄԱԿ-ի մանկական հիմնադրամի հայաստանյան գրասենյակի ղեկավար Լեյլի Մոշիրին էլ փաստեց, որ կրծքի կաթով չկերակրված նորածինները 25 անգամ ավելի շատ են մահանալուն միտված:

«Կրծքով կերակրման պրակտիկան բարելավելու դեպքում տարեկան կարող ենք փրկել 1,5 միլիոն նորածնի: Ընդ որում, ավելի մեծ տարիքում կրծքով կերակրող կանանց մոտ նվազում է կրծքի քաղցկեղի հավանականությունը: Իսկ մանկական փոշի կերերը, նույնիսկ եթե փակ են, կարող են չհանդիսանալ ստերիլ տեսակ ու վնասակար լինել»,- ասաց Լ.Մոշիրին:

Գրասենյակի ղեկավարի խոսքով` կրծքով կերակրելը նաև մարդու իրավունքի խնդիր է:

«Եվրոպական 25 երկիր արդեն փոփոխել է իր օրեսդրությունը, Վրաստանն ու Ալբանիան առանձին օրենքներ են ընդունել: Հայաստանի դեպքում խնդիրն այն չէ, թե երեխաները պետք է կերակրվեն կրծքով, թե ոչ, այլ խնդիրն այն է, թե արդյոք ունե՞նք բավականին քաղաքական կամք` նորածին երեխաների կյանքը պահպանելու»,- եզրափակեց Լ.Մոշիրին: